مختصر حالات

تحصیل ابتدای تحصیل وطن میں انجام دی پہر دینی تعلیم حاصل کرنے کے لیے شہر لکھنو میں مدرسہ ناظمیہ میں داخلہ لیا۔٨سال مدرسہ ناظمیہ میں علوم دینی حاصل کرنے کے بعد مدرسہ ناظمیہ سے فارغ التحصیل ہوئے مزید آگے پڑھنے کے لیے سن ۱۹۸۲ حوزہ علمیہ قم ایران تشریف لے گۓ۔١٤ سال ایران میں علوم آل محمد حاصل کرتے رہے ۔اس درمیان کبھی بھی انہوں نے تبلیغ دین کو فراموش نہیں کیا ۔ہر سال ماہ رمضان اور محرم و صفر تبلیغ دین کے لئے لیے ہندوستان کے مختلف شہروں کا سفر کرتے رہے اور تبلیغ دین کے اہم فرائض کو انجام دیا جیسے وشاکاپٹنم، مچھلی پٹنم،بیگن پلی، حیدرآباد، فیض آباد،جونپور، کلکتہ اور یوپی کے مختلف چھوٹے چھوٹے گاؤں کا بھی سفر کیا۔١٩٩٧کو تبلیغ دین اور تدریس کے لیے ایران کو الوداع کہا۔اور ہندوستان واپس آگئے۔2سال اندرا پردیش کے بیگن پلی قبضہ میں تبلیغ دین کے فرائض انجام دیا ۔۔اور سن 1999 جونپور تشریف لائے اور مدرسہ ناصریہ میں 4 سال تدریس کے فرائض انجام دیے اور ساتھ ہی ساتھ تبلیغ بھی کرتے رہے اور اپنے وطن میں جمعہ کی نماز قائم کی۔اور تین سال اپنے وطن میں امام جمعہ رہے۔ 2003 کو اربعین کے دن مجلس پڑھ کر کراکت سے جونپور آتے ہوے ایک سڑک حادثے میں انکا انتقال ہوگیا اور 40سال کی مختصر عمر میں اس جہان فانی کو الوداع کہا۔اور انکو شہر جونپور میں سپرد خاک کیا گیا۔

سید باقر رضا رضوی

سوانح حیات

مرزا ابوالقاسم صاحب جو بمبئی کی خوجہ شیعہ اثناعشری مسجد میں امام جماعت کے فرائض انجام دیتے رہے اور وہیں ان کا انتقال ہوا، فخر العلماء مرزا محمد عالم انہیں کے فرزند ارجمند تھے۔

ابتدائی تعلیم کے بعد ۱۹۴۶ میں آپ کا داخلہ سلطان المدارس لکھنؤ کے درجہ سوم میں ہوا۔ جہاں سے آپ نے صدرالافاضل تک پوری تعلیم حاصل کی اسی دوران الہ آباد بورڈ لکھنؤ یونیورٹی اور شیعہ عربی کالج سے بھی اعلی سندیں حاصل کیں، صدر الافاضل کا امتحان پاس کر کے 1957 میں آپ برائے تحصیل و تکمیل علوم عراق تشریف لے گئے ۔ ابتدا میں آپ نے چند ماه کربلائے معلی میں قیام فرمایا اور شرح کبیر کو دوبارہ مولانا سید حسن مرحوم (مقیم کربلائے معلی عراق) سے پڑھا۔ اس کے بعد نجف اشرف میں حجت الاسلام آغا شیخ محمد علی بربری سے نحو وصرف، معانی و بیان کی تکمیل کی، اور حجت الاسلام آغا مرزا اسلم خراسانی و حجت الاسلام آقائے سیدنصر اللہ المستنبط و حجت الاسلام آقائے شیخ علی اور آقائے سید جواد تبریزی وغیرہم سے فقہ و اصول کے درسیات کی تکمیل کی۔ جس کے بعد آپ ۱۹۶۱ء میں ہندوستان واپس تشریف لائے۔

تصنیف وتالیف

عراق روانگی سے قبل آپ علمی جریده العلم کے مدیر اعلی رہے، اور آپ نے اہمیت نماز ، محيط الدائرہ اور نقد الشعر کی تلخیص فرمائی ۔ دوران قیام عراق شرح تجرید علامہ حلی کا اردو میں ترجمہ کیا۔ واپسی عراق کے بعد آپ کے تصانیف تقریبا ڈھائی درجن ہیں ۔ بعض کتب دوسری زبانوں میں بھی ترجمہ ہوئیں۔
اساتذہ

آپ نے حسب ذیل علماء و افضل سے علی الترتيب تعلیم حاصل کی:

مولانا سید محمد حسن صاحب

مولانا سید الطاف حیدر صاحب مولانا سید احمد صاحب

مولانا سید ابن حسن نونہروی صاحب

مولانا کلب عابد صاحب

مولانا سید محمد صاحب

ان کے علاوہ مفتی اعظم صاحب ، محسن الملت، مولوی سید صادق صاحب اور مولانا سید حسین صاحب سے بھی شرف تلمذ حاصل رہا۔

عراق

حجت الاسلام آغا شیخ محمد علی بربری

حجت الاسلام آغا مرزا اسلم خراسانی

حجت الاسلام آقائے سیدنصر اللہ المستنبط

حجت الاسلام آقائے شیخ علی

آقائے سید جواد تبریزی
قومی خدمات

آپ اداره عالیہ تبلیغ و اشاعت کے بانی تھے۔ مدینہ العلم جامعة التبلیغ کے پرنسپل تھے۔ اس کے علاوہ مدرسه ناصر یہ جونپور اور لکھنؤ کے شیعہ کالج کی مجلس عامہ کے ممبر اور مسلم پرسنل لابورڈ کے ممبر تھے۔ آپ کے قائم کردہ مدرسہ جامعة التبلیغ سے تشنگان علوم سیراب ہو رہے ہیں جن میں ہندوستان کے ہر صوبے اور علاقے کے طلباء شامل ہیں۔
وفات

آپ کا انتقال ۱۴ ربیع الثانی 1405 ھ ہجری درگاہ حضرت عباس رستمگر لکھنو میں قلبی دورہ پڑنے سے ہوا اور اپنے تعمیر کردہ مدرسہ جامعة التبليغ مصاحب گنج لکھنو میں حسب وصیت سپرد خاک کئے گئے۔

میرزا محمد عالم

سوانح حیات

مولانا سید انتظار حسین صاحب نقوی امروہوی سنہ 1355 ھ میں عثمان پور میں پیدا ہوئے۔ آپ کے مورث اعلیٰ سید نظام احمد غنج رواں کےپوتے سید چاند نے اپنے فرزند سید عثمان کے نام پر موضع عثمان پور آباد کیا تھا ۔

آپ نے مدرسہ باب العلم نوگاواں سادات میں مولانا سید آقا حیدر صاحب قبلہ مرحوم سے علوم دینیہ کی تحصیل کی ۔ 1371 ھ سے 1374 ھ تک کیرا (کچھ) کی خوجہ شیعہ اثنا عشری جماعت میں مذہبی خدمات انجام دئیے۔ اس کے بعد آپ تانزانیا تشریف لے گئے جہاں سونگیا اور سنگیڈا کی جامعتوں میں خدمتیں انجام دیں۔ تانزانیا کے بعد آپ ماڈاگاسکر گئے جہاں 1398 ھ تک مذہبی خدمات انجام دیتے رہے۔

افریقہ سے وطن واپسی کے بعد آپ نے اپنے نو تعمیر کشادہ مکان کے بیرونی حصہ میں آٹا پیسنے اور دھان کوٹنے کی مشینیں لگائیں جن سے آپ کو اچھی اور حلال روزی بے منت احدے ملتی تھی ۔

تصانیف

ستون صداقت

اظہار حق

سید انتظار حسین امروهوی

سوانح حیات

حضرت آیت اللہ سید کاظم نقوی رہ صاحب 13 جمادی الاولی 1353 ھ کو لکھنو میں پیدا ہوئے ۔ آپ کے والد گرامی ممتاز العلماء آیت الله سید ابو الحسن نقوی منن صاحب ( پرنسپل مدرسة الواعظین لکھنو) تھے ۔ آپ کی والدہ سیدہ امۃ الحسین بنت ابوالفضل العباس نصیرآبادی تھیں ۔ آپ کے برادران آیت الله العظمی سید العلماء سیدعلی نقی نقوی ، علم الہدی آیت الله سید مرتضی نقوی ، آیت الله سید باقر نقوی مقیم دبی ، اور مولانا سید عبد الحسن نقوی ہیں ۔ زوجہ سیدہ محمودہ بیگم بنت مولوی سید اعظم علی نقوی جائسی ایڈووکیٹ تھیں۔ آپ خاندان اجتهاد ، مجدد الشریعۃ محی الملۃ آیت الله العظمی سید دلدارعلی غفران مآب طاب ثراہ کے روشن چراغ ہیں۔

آیت اللہ سید کاظم نقوی رہ صاحب نے لکھنو میں تعلیم حاصل کرنے کے بعد حوزہ نجف جانے کے بعد اجازہ اجتہاد دریافت کیا۔ اور ہندوستان واپس آنے کے بعد مختلف علمی ، قومی خدمات میں تا حیات مشغول رہے۔

اولاد

سید عباس علی نقوی مقیم امریکہ ( متولد به ۵ اراگست ۱۹۸۲ء)

مناصب

امام جمعه مسجد جامع مسلم یونیورسٹی علی گڑھ

ناظم شعبۂ دینیات مسلم یو نیورسٹی

صدر شعبۂ دینیات مسلم یونیورسٹی

ڈین فیکلٹی آف تھیالوی مسلم یونیورسٹی
اساتذہ و تلامذہ
اساتذہ

حجت الاسلام علامہ سید کاظم حسین نقوی

آیت الله علی سیدعلی نقی نقوی نقن صاحب

مفتی اعظم آیۃ اللہ العظمی سید احمدعلی موسوی

آیت اللہ العظمی سید ابوالقاسم الخوئی

آیت الله العظمی سید علی بہشتی

آیت اللہ العظمی سید مرتضی خلخالی

آیت اللہ العظمی محمد تقی خوانساری

آیت اللہ سید ایوب حسین نقوی سرسوی صاحب

آیت اللہ سید رسول احمد رضوی صاحب گوپالپوری

تلامذۃ

عالیجناب خضیر موسی جعفر (نائب صدر عراق )

پروفیسر لطیف حسین شاہ کاظمی شعبه فلسفه مسلم یونیورسٹی علی گڑھ

ڈاکٹر نسیم زہرا لکچرر شعبہ تھالوجی مسلم یونیورسٹی علی گڑھ

پروفیسر فرمان حسین سابق ڈین شعبه دینیات مسلم یونیورسٹی

ڈاکٹر رانی با نو اسسٹنٹ پروفیسر مین کا لج مسلم یونیورسٹی

علامہ حامد علی شاہ ، پاکستان

علامہ حشم حسین ، پاکستان

آپ کے بیشتر تلامذہ ایران اور عراق میں ہیں ۔
تصانیف
مطبوعہ تصانیف

(1) درس حکومت

(۲) اسلام کی ضرورت

(۳) اسلام اور طبقاتی نظام

(4) مذہب، اطمینان نفس کا سر مایہ

(۵) اسلام کیا چاہتا ہے

(6) عورت اور اسلام

(7)ماده، قدیم یا حادث

(۸) یثرب کا مسافر سر زمین کربلا پر

(۹) مذہب اور ضمیر

(۱۰) اسلام اور آزادی

(۱۱) مذہب اور زندگی

(12) حضرت علی کا نقطہ نظر اور طریقہ کا ر

( ۱۳ ) وحی ایک پر اسرار رابطہ

(14)شق القمر

(۱۵) قانون ساز کون ۔ انسان یا خدا

(16) عرب کے اقتصادیات اور اسلام کے خدمات

(۱۷) دنیا، دین کی نظر میں

(۱۸) جہالت، بیماری اور تنگدستی

(۱۹) حسین اور انسانیت

(۲۰) ایام عزا کا اختتام اور اپنے نفوں کا جائزہ (۲۱) من و اہرمن

غیر مطبوعہ تصانیف

(1) حاشیه قوانین الاصول

(۲) حاشیہ رسائل

(۳) شرح رسائل (اردو)

(۴) شرح کافی

(۵) شرح فرائد الاصول

(6) شرح معالم الاصول

(7) شرح مکاسب ( اردو )

(۸) انجام کائنات

(۹) کشکول

(۱۰) فقه اسلامی کے اصول تحقیق

وفات

آپ کی وفات ۳/ جمادی الثانی 1439 ہجری سه شنبہ کے دن کو به مقام شریعت کدہ رئیس العلماء ۱ بجے دن میں ہوئی ۔ اور 1 بجے شب میں بہ مقام کر بلائے شاہ جمال علی گڑھ میں آپ کو سپرد لحد کیا گیا۔

سید کاظم نقوی

سوانح حیات

سنہ 1349ھ میں باسٹہ ضلع بجنور میں پیدا ہوئے۔ آپ کے والد محترم مولانا سید صغیر حسن تقوی تھے۔

غُرّۃُ العلماء، جناب، سرتاج العلماء اور ابوذر زمان آپ کے مشہور القاب ہیں۔ جناب کی زندگی میں فضول خرچی نامی چیز دکھائی نہیں دیتی بلکہ آپ انتہائی درجہ پرہیز فرماتے تھے۔

سیدمحمد صاحب عالم باعمل، متقی۔پرہیزگار اور ایک اچھے شاعر تھے۔ آپ کا خاندان علم و فضل میں معروف تھا۔ جناب کے والد بھی ایک عالم باعمل تھے۔

 تعلیم

آپ نے ابتدائی تعلیم اپنے خانوادہ سے ہی حاصل کی اور اپنے والدمحترم کی خدمت میں زانوئے ادب تہہ کئے نیز سات سال کی عمر میں قرآن مجید کی تعلیم مکمل کی۔

ابتدائی تعلیم کے بعدسنہ 1362ھ میں مدرسہ باب العلم نوگانواں کا رخ کیا وہاں رہ کر چار سال تک سلطان الواعظین علامہ آقا حیدراور آیۃ اللہ سبط نبی کی خدمت میں زانوئے ادب تہہ کئے۔ پھرمدرسہ ناظمیہ لکھنؤکے لئے عازم سفر ہوئے، وہاں رہ کر بزرگ اور جیّد علماء اعلام کی خدمت میں زانوئے ادب تہہ کئے مثلاًمولانا ایوب حسین، تاج العلماء سید محمد زکی، مفتی سیداحمدعلی شوشتری اور مولانا رسول احمدگوپالپوری وغیرہ۔

سنہ1951ء میں نجف اشرف(عراق) کے حوزہ کی جانب گامزن ہوئے اور زمانہ کے مشہور ومعروف فقہاء کی خدمت میں رہ کر کسب فیض کیا جن میں سے آیۃ اللہ العظمیٰ سید محسن الحکیم، آیۃ اللہ العظمیٰ سید ابوالقاسم الموسوی الخوئی، آیۃ اللہ العظمیٰ اسداللہ مدنی تبریزی، استاد مدرس افغانی، آیۃ اللہ حیدرعباس الہ آبادی اور استاد اشکوری وغیرہ کے اسمائے گرامی قابل ذکر ہیں۔

سید محمدصاحب نجف اشرف میں تعلیم حاصل کرنے کے ساتھ ساتھ مدرسہ ایروانی میں تدریس کے فرائض بھی انجام دیتے رہے کیونکہ آپ کو فقہ و اصول میں بہت مہارت حاصل تھی، طلاب کی کثیر تعداد آپ کے درس میں شرکت کرتی تھی۔ اس دوران جناب ہر شب جمعہ نجف اشرف سے پیدل چل کر کربلا کی زیارت کے لئے تشریف لے جاتے تھے۔

چونتیس سال کی عمر میں جناب کو حوزہ علمیہ نجف اشرف کے چار اساتذہ نے اجتہاد کے اجازے مرحمت فرمائی:

(1)آیۃ اللہ العظمیٰ سید محسن الحکیم

(2)آیۃ اللہ العظمیٰ سید حسین بروجردی

(3)آیۃ اللہ العظمیٰ سید باقر الصدر

(4)آیۃ اللہ العظمیٰ سید ابوالقاسم الموسوی الخوئی۔

آپ سولہا سال تک نجف اشرف میں بحرِ بیکراں سے منسلک رہے اورر سنہ 1967ء میں درجۂ اجتہاد پر فائز ہوکرنجف سے ہندوستان واپس آئے۔

اولاد

موصوف کے سارے بیٹے اہلِ علم و کمال ہیں اور ہندوستان کے مختلف شہروں میں تحریر، تقریر اور تدریس کے ذیعہ اشاعت علوم محمدؐ و آل محمدؐمیں مشغول ہیں جن کے اسمائے گرامی کچھ اس طرح سے ہیں:

مولاناسید حسین اصغر

مولانا سید عابد رضا

مولانا سید جعفر رضا

مولانا سید موسیٰ رضا

مولانا سید علی رضا

مولانا ڈاکٹرسید تقی رضا برقعی

مولاناڈاکٹر سید ہادی رضا(پروفیسر اے ایم یو علیگڑھ)

خدمات
دینی خدمات

موصوف نے بمبئی، دہلی اور گجرات وغیرہ جیسے بڑے بڑے شہروں میں دینی خدمات انجام دیں۔

اپنی زندگی کے آخر میں شہررامپور میں امام جمعہ و جماعت کے عنوان سے منتخب کئے گئے۔

جناب باسٹوی صاحب، دینی و اجتماعی پروگراموں میں حاضری دے کر اس کی معنوی صورت کو برقرار رکھتے تھے۔ پھندیڑی سادات میں انہدام جنت البقیع کے سلسلہ سے سہ روزہ اصلاحی و احتجاجی مجالس کے اجتماع میں امام جماعت کے فرائض بھی انجام دیتے تھے اور پروگرام کی صدارت بھی آپ ہی کیاکرتے تھے۔ مؤمنین موصوف سے بہت محبت کرتے اور وقتاً فوقتاً آپ کی زیارت سے مشرف ہوتے رہتے تھے۔

علمی خدمات

مدرسہ باب العلم نوگانواں سادات میں مدیریت و تدریس کے فرائض کو بنحو احسن انجام دیا، اس کے بعد مدرسہ منصبیہ میرٹھ کی مدیریت وتدریس کو سنبھالااور وہاں بھی اپنی لیاقت کا پرچم لہرادیا۔

آپ کا شمارعربی، فارسی اور اردو کے بہترین شعراء میں ہوتا تھا۔

شاگردان

ابوذرزمان نے بہت سے شاگردوں کی تربیت فرمائی جن میں سے :

مولانا محمدعلی محسن تقوی

مولانا افضال حسین جالپوری

مولانا عابد رضا تقوی

مولاناسیدناصرعباس پھندیڑوی

مولانا شایان چھولسی

مولانا عبداللہ زیدی پھندیڑوی

مولانا حسن اختر نوگانوی

مولانا سید محمد اصغرپھندیڑوی

مولانا طالب حسین پھندیڑوی

مولانا شاہنواز حسین میمن

مولانا ڈاکٹر سید عباس رضا رضوی چھولسی

مولانا صادق خوئی

مولانا علقمی

مولانا غمخوار حسین وغیرہ کے اسمائے گرامی قابل ذکر ہیں

تصانیف
منظوم نہج البلاغہ

آیۃ اللہ سیدمحمدصاحب نے متعدد کتابیں تالیف کیں اور مختلف تحقیقیں انجام دیں، آپ نےنہج البلاغہ کا منظوم ترجمہ بھی کیاجس کا قلمی نسخہ آپ کے فرزندارجمند "مولانا سید علی رضا تقوی" کے پاس محفوظ ہے۔ مولائے کائناتؑ کے ایک جملہ کا منظوم ترجمہ نمونہ کے طور پر اس طرح پیش کیا جاسکتا ہے:

دور فتنہ میں رہو اے نونہال!

اونٹ کے دوسالہ بچہ کی مثال

کوئی اس کی پشت پر بیٹھے تو چل سکتا نہیں

اس کے خالی تھن سے کچھ بھی دودھ مل سکتا نہیں

انقلابِ عالم

امروہہ کے لقمان رضا نامی شخص نے امامت کا دعویٰ کیا تو آیۃ اللہ سیدمحمدباسٹوی نے اس سے مناظرہ کیا اور اس کی کتاب "آفتابِ عالم" کے جواب میں "انقلابِ عالم" نامی سات جلدوں پر مشتمل کتاب تحریر فرمائی جو قلمی صورت میں ان کے بیٹوں کے پاس موجود ہے۔

مناظرات

مولانا انصار حسین زیدی پھندیڑوی(فاضل مشرقیات) کے ساتھ ایک مناظرہ ہوا جو تین دن تک جاری رہا، یہ مناظرہ وحدانیت خدا کے عنوان سے تھا۔ آخرکارابوذر زمان نے انصارصاحب کو قانع کردیا، اس موضوع پر مولانا انصار صاحب نے "تدبّر فی القرآن" نامی کتاب بھی لکھی، جب اس کا علم سیدمحمد صاحب کو ہوا تو بازار میں آنے سے پہلے اپنی ساری جمع پونجی کے عوض ساری کتابوں کو خرید لیا۔

&nbsp;

امروہہ کے لقمان رضا نامی شخص نے امامت کا دعویٰ کیا تو آیۃ اللہ سیدمحمدباسٹوی نے اس سے مناظرہ کیا اور آپ اس مناظرے میں کامیاب ہوئے ۔
ذاتی صفات

نحو و صرف، فصاحت وبلاغت، فقہ و اصول، حدیث و تفسیر اور کلام و عقائد میں جناب کی نظیر نہیں ملتی۔ دین و دیانت، اورتقویٰ و پرہیز گاری جیسے اوصاف آپ کی ذات سے ظاہرتھے۔ دولتِ دنیاکی طرف کبھی بھی نظر نہیں کی بلکہ ہر وقت دولتِ علم کی فکر میں محو رہتے تھے۔ جناب کی زندگی میں علم اورکتاب کی بہت زیادہ اہمیت تھی۔

اگر اخلاقی اعتبار سے دیکھا جائے تو آپ کی شخصیت ایسی تھی کہ بلاتفریق مذہب وملت لوگ آپ کی خدمت میں آتے اور اپنے لئے دعا کی گزارش کرتے تھے تو جناب ان کواہلبیت اطہارعلیہم السلام سے منقول دعاؤں کی تعلیم فرماتے اور اس کے ہمراہ اسپند، کلونجی اور سونٹ کے استعمال کی تاکید فرمایاکرتے تھے۔
وفات

یہ علم و عمل کا آفتاب25/ربیع الاوّل سنہ 1428ھ میں سرزمین رامپور پرغروب ہوگیا اور چاہنے والوں کی ہزار آہ و بکا کے ہمراہ نوابین رامپورکے مقبرہ عالیہ میں سپردِ لحد کیا گیا۔

سید محمد تقوی

سوانح حیات

مبارکپور اعظم گڑھ یوپی کا ایک ھونہار اور ہے مثال شخصیت

(حجت الاسلام والمسلمین الحاج مولانا علی ارشاد صاحب قبلہ نجفی اعلی اللہ مقامہ)

مبارکپور اعظم گڑھ کا یہ درخشندہ ستارہ ۱۱ ذیقعدہ ۱۳۴۵ھجری مطابق مارچ ۱۹۲۶عیسوی کو افق مبارکپور پہ طلوع ہوا

آپکے والد ماجد عالیجناب الحاج مولانا حکیم علی حماد صاحب قبلہ اعلی اللہ مقامہ اور والدہ ماجدہ صغری مرحومہ جو جناب امان اللہ مرحوم ساکن املو کی بیٹی تھیں

آپنے ابتدائی تعلیم گھر پر اپنے عظیم المرتبت والد سے پھر مدرسہ احیاء العلوم مبارکپورمیں پھر ایک سال مدرسہ باب العلم میں حاصل کی اسکے بعد مدرسہ ناصریہ جونپور تشریف لے گئے جہاں ۱۹۴۲ء میں "مولوی" اور ۱۹۴۳ء میں "عالم" کی سند لیکر جامعہ جوادیہ بنارس چلے گئے وہاں سے ۱۹۴۸ء میں "فخرالافاضل" کرکے ۱۹۴۹ء میں "فاضل طب الہ آباد بورڈ" کا امتحان پاس کیا اور جامعہ جوادیہ میں تعلیم کے دوران ھی لکھنو یونیورسٹی سے ۱۹۴۶ء میں "دبیر کا مل کا امتحان دیکر سند حاصل کی

ھندوستان کی تعلیم سے فراغت کے بعد ۱۹ شعبان ۱۳۶۸ ھ مطابق جون ۱۹۴۹ء بغرض تعلیم اجتہاد آپ نجف اشرف عراق تشریف لے گئے اور وہاں سے اجازات اجتہاد حاصل کرکے ۲۳رمضان المبارک ۱۳۷۳ھ مطابق ۱۹۵۴ء وطن عزیز واپس لوٹے

۱۹۵۴ء سے ۱۹۸۷ء تک آپنے ھندوستان کے مختلف مقامات اور متعدد مدارس و جامعات میں تبلیغ و تدریس کے فرائض انجام دیۓ

۲ بار مدرسہ باب العلم مبارکپور کے پرنسپل اور تا عمر شیعہ جامع مسجد مبارکپور کے امام جمعہ اور متولی رہے

۱۹۸۶ء میں حکومت ایران کی دعوت پر ایران تشریف لے گئے

آپنے شہرہ آفاق علماء کی متعدد کتابوں کے ترجمے کئے

آپ غیر معمولی صلاحیتوں کے مالک تھے مگر لوگوں نے آپکو پہچانا نہیں

"قدر گوھر شاہ داند یا بداند جوھری"

آپ حق گوئی میں کمال رکھتے تھے اور حق بولنے میں کسی کا خیال نہیں رکھتے تھے اسی لیے بعض لوگ آپکی حق گوئی کی بنا پر آپ سے ناراض رہتے تھے

مگر

آپ نے لوگوں کی رضا کے لیے خدا کی ناراضگی مول نہیں لی

آپکی زندگی میں دنیاوی سکون میسر نہ تھا مگر کبھی کسی سے تقدیر کا شکوہ نہیں کیا

صبرو شکر کی کٹھن منزلوں کو طے کرتے ہوئے آپنے ۱۳محرم ۱۴۰۸ھ مطابق ۸ ستمبر ۱۹۸۷ء سہ پہر ۲ بجے داعی اجل کو لبیک کہا اور ھمیں ھمیشہ کے لیے اپنے عظیم سایہ سے محروم کر دیا

انا للہ و انا الیہ راجعون

ھزاروں سال نرگس اپنی بے نوری پہ روتی ہے

بڑی مشکل سے ھو تا ہے چمن میں دیدہ ور پیدا

آ پ نے چار فرزند چھوڑ ے

جنمیں ایک مولانا فيروز عباس صاحب قبله

دوسرے حقير سراپا تقصير احسان عباس

تیسرے مولانا عرفان عباس صاحب سلمه

چوتھے مولانا محمد عباس سلمہ

اور چاروں اسوقت خدمت دین میں مصروف ہیں

اللہ ھماری خدمات کو قبول کرے اور توفیقات میں اضافہ فرمائے .

آپکے عظیم المرتبت اساتذہ میں سر فہرست ہندوستان میں

آیۃ اللہ فی العالمین الحاج مولانا سید ظفر الحسن الرضوی صاحب قبلہ اعلی اللہ مقامہ

(سابق پرنسپل جامعۂ جوادیہ بنارس)

حضرت حجۃ الاسلام والمسلمین الحاج مولانا سید وصی محمد صاحب قبلہ اعلی اللہ مقامہ

(سابق پرنسپل جامعۂ وثیقہ عربی کالج فیض آباد)

اور عراق میں

مرجع جہان تشیع حضرت آیۃ اللہ العظمٰی السید محسن الحکیم اعلی اللہ مقامہ

مرجع جہان تشیع حضرت آیۃ اللہ العظمیٰ السید ابو القاسم الموسوی الخوئ اعلی اللہ مقامہ

وغیرھم کا شمار ہوتا ہے

اور آپ کے شاگردوں کی اک طویل فہرست ہے جنمیں مشہور زمانہ شخصیتیں یہ ہیں

حجۃ الاسلام والمسلمین عالیجناب الحاج مولانا محمود الحسن خانصاحب قبلہ اعلی اللہ مقامہ

(سابق پرنسپل جامعۂ ناصریہ جونپور)

حجۃ الاسلام والمسلمین عالیجناب الحاج مولانا سید عابد حسین صاحب قبلہ کراروی اعلی اللہ مقامہ

(بانئ حوزہ علمیہ امام خمینی رہ وٹوا احمدآباد گجرات)

حجۃ الاسلام والمسلمین عالیجناب مولانا تقی الحیدری صاحب قبلہ اعلی اللہ مقامہ

(سابق پرنسپل جامعۂ وثیقہ عربی کالج فیض آباد)

وغیرھم

شجرہ مبارکہ علماء خانوادہ واحدی:-

مولانا فیروز عباس،احسان عباس, مولانا عرفان عباس, مولانا محمد عباس

ابن مولانا علی ارشاد النجفی اعلی اللہ مقامہ

ابن مولانا علی حماد (حکیم) اعلی اللہ مقامہ

ابن مولانا علی سجاد(حکیم) اعلی اللہ مقامہ

ابن مولانا میانصاحب یار علی اعلی اللہ مقامہ

ابن مولانا میانصاحب عبد الواحد اعلی اللہ مقامہ

ابن مولانا میانصاحب جان محمد اعلی اللہ مقامہ

ابن شیخ خوانوادہ و رئیس قوم میانصاحب دوست محمد اعلی اللہ مقامہ

علی ارشاد مبارکپوری

<div>
آج کا دور مصرفیتوں کا دور ہے ہماری معاشرت کا انداز بڑی حد تک مشینی ہو گیا ہے زندگی کی بدلتی ہوئی قدروں سے دلوں کی آبادیاں ویران ہو رہی ہیں فکرونظر کا ذوق اور سوچ کا انداز بدل جانے سے ہمارے ہاں ہیرو شپ کا معیار بھی بہت پست سطح پر آگیا ہے آج کھلاڑی‘ ٹی وی اور بڑی سکرین کے فن کار ہماری نسلوں کے آئیڈیل اور ہیرو قرار پائے ہیں جس کی وجہ سے ماضی و حال کے وہ عظیم سپوت اور روشنی کی وہ برتر قندیلیں ہماری نظروں سے اوجھل ہو گئی ہیں لہذا انھیں جاننا اور دوسروں تک ان کے کارناموں کو پہنچانا ہماری ذمہ داری ہے۔ اپنے اسلاف اور خصوصاً اہل علم اسلاف کو یادرکھنا بعد میں آنے والوں کے لیے ضروری ہوتا ہے اور رہنمائی کا ذریعہ بھی اسی لیے ان کی یاد کو تازہ اور ان کی زندگی سے خود کے لیے چراغ راہ بنانا بہت ضروری ہے اور یہ تبھی ممکن ہے جب ہم ان کی حیات کے نشیب و فراز اور ان کی کاوشوں سے آگاہ رہیں۔ بلاشبہ انسان اشرف المخلوقات ہے۔ رب ذوالجلال نے اسے دوسری مخلوقات پر یہ فوقیت علم کی بنا پر عطا کی ہے۔ اللہ ہی ہے جس نے انسان کو قلم کے ذریعے علم سکھایا اور زمین پر اپنا نائب بنا کر بھیجا۔ اُس کے خاص بندے اسی قلم اور کائنات کے مشاہدے کے ذریعے اپنے علم میں اضافہ کرتے اور اسے آگے بڑھاتے ہیں۔ اللہ کے ایسے ہی خاص بندوں میں سے ایک نام مولانا موصوف کا ہے جنہوں نے علم کے سمندر میں ڈوب کر سراغِ زندگی پایا اور اسی علم کے بحرِ بے کراں بن کر اس کے دامن کو وسیع اور تشنگانِ علم کو سیراب کیا۔ اس دنیائے فانی میں بسنے والے ہر انسان کا لمحہ بتدریج اس کی شخصیت کی تکمیل کرتا ہے۔ زمانہ اسے مبلغ، محدث، مؤرخ، محقق، مقرر، مصلح، مربی و محسن کے خطابات عطا کرتا ہے۔ ایسے شخص کی زندگی سراپا علم و عمل، سراپا جہاد اور عالم انسانیت کے لیے سرچشمہ ہوتی ہے۔ وہ زندہ رہتا ہے تو محترم و مکرم ہو کر زندگی کے لمحات گزارتا ہےاور اس عالمِ فنا سے منہ موڑتا ہے تو اپنے پیچھے نہ بھلائے جا سکنے والے کارناموں کی ایک تاریخ رقم کر جاتا ہے۔ ایک پورا زمانہ، ایک پورا عہد اس کی شخصیت سے منسوب ہو جاتا ہے۔ مستقبل کے محرر و مؤرخ اسے اوراقِ تاریخ میں یاد گار زمانہ قرار دیتے ہیں۔ آپ کے بارے میں معلومات اپڈیٹ کی جائیں گی۔

</div>

سید طیب موسوی جزایری لکهنوی

سوانح حیات
مولانا سید محمد عباس صاحب ابن سید عبدالکریم صاحب اپنے وطن محلہ برہم پورہ (مظفر پور بہار ) میں 1343 ھ میں پیدا ہوئے ۔ کم سنی میں سایہ پدری سے محروم ہوگئے ۔ مدرسہ عباسیہ پٹنہ میں تعلیم حاصل کرنے کے بعد سلطان المدارس لکھنؤ سے صدرالافاضل کیا ۔

1946 سے محلہ کمرہ مظفر پور کی بڑی مسجد میں امام جماعت مقرر ہوئے ۔ اکتوبر 1950 میں ٹانگانیا (تانزانیا) تشریف لے گئے ۔ جہاں شہر لنڈی میں پیش نماز رہے ۔

جنوری 1960 میں وہاں سے واپس تشریف لائے ۔ اور 1961 میں دوبارہ تانزانیا گئے جہاں مٹاما میں پیش نماز رہے ۔

1963 سے کمرہ مظفرپور مسجد میں امامت جماعت آپ سے تعلق ہوئی جہاں آپ آخر عمر تک رہے ۔

آپ نے 22 ذی الحجۃ 1412 ھ کو بروز پنجشنبہ رحلت فرمائی ۔ 25 جون کو کربلائے لشکری پیر ، داؤد پور مظفر پور میں دفن ہوئے ۔

سید محمد عباس مظفرپوری

مختصر تعارف
اسم گرامی: مجتبیٰ علی خان

عرفیت : عابد(گھروالوں کے لئے )

شہرت :ادیب الہندی

تخلص:ادیب

وطن : عبد اللہ بہارپور،ضلع سلطان پور

تاریخ ولادتــ: ۱۵؍رمضان المبارک ۱۳۶۴ھ؁مطابق ۲۳؍اگست ۱۹۴۵ء؁

ولدیت:جناب الحاج محمد ضیغم علی خان مرحوم (رئیس بہارپور)

ابتدائی تعلیم :جامعہ ناظمیہ لکھنؤ

اعلیٰ تعلیم: حوزہ علمیہ نجف اشرف ؛(2؍محرم 1384 ھ کونجف اشرف روانہ ہوئے اورتقریباً۱۲سال تک اساطین فقہ واصول سے کسب فیض کرنے کے بعد 1396 ھ میں ہندوستان واپس آئے)

اسناد:عالم ،فاضل ،ادیب ماہر،ادیب کامل،بی اے (B.A)ایم اے(M.A)ایل ایل بی (L.L.B)

اساتذہ کرام

آیۃ اللہ العظمیٰ حکیمؒ ،آیۃ اللہ العظمیٰ خمینی ؒ،آیۃ اللہ العظمیٰ خوئی ؒ،آیۃ اللہ راستی ،آیۃ اللہ کریمی ،مفتی اعظم مولاناسیداحمد علی ؒ، استاذ الاساتذہ مولانامحمد شاکرامروہوی دام عزہ،علامہ اخترعلی تلہری صاحب ،مولاناابن حیدرصاحب وغیرہ

احباب وہم عصر

آیۃ اللہ سید صادق حسینی شیرازی دام عزہ،آیۃ اللہ سید مجتبیٰ شیرازی دام عزہ ،حجۃ الاسلام والمسلمین مولانا سیدتقی الحیدری صاحب،حجۃ الاسلام سید محمد کاظم کریمی صاحب ،مولاناسیدعلی اختر رضوی شعور ؔگوپال پوری ؒ،عالی جناب قمراحسن صاحب،و۔۔۔۔

تبلیغی سفر
الف:عشرہ مجالس :آپ نے ہندوستان کے اکثرشہرو ںمیں عشرہ مجالس خطاب کیا نیز اسی غرض سے امریکا،کناڈا،انگلینڈ،افریقا،اور امارات متحدہ تشریف لے گئے ۔

ب:مذہبی کانفرنس:آپ نے دینی اورمذہبی کانفرنس کے سلسلے میں کئی شہروں کاسفرکیاجن میں مجلس علماء وواعظین کے زیراہتمام دہلی ، میرٹھ اور بنگلور میں منعقدہ کانفرنسیں نمایاں حیثیت کی حامل ہیں ۔

وکالت
آپ آیۃ اللہ العظمیٰ سید محمد شیرازی اعلی اللہ مقامہ کے وکیل تھے ،ا س کے علاوہ جن آیات اعظام نے مختلف اجازے عطا کئے تھے ان کی تعدادچوبیس (۲۴)ہے، جن میں آیۃ اللہ العظمیٰ حکیمؒ ، آیۃ اللہ العظمیٰ اراکیؒ، آیۃ اللہ العظمیٰ کلپائیگانیؒ،آیۃ اللہ العظمیٰ خمینی ؒ،اورآیۃ العظمیٰ خوئی ؒ سرفہرست ہیں ۔

مناصب
۱۔وائس پرنسپل مدرسۃ الواعظین لکھنؤ (1400 ھ میں )

۲۔پرنسپل منصبیہ عربی کالج میرٹھ (1419 ھ میں )

۳۔جنرل سیکرٹری مجلس علماء وواعظین

۴۔ مدرس وثیقہ عربی کالج فیض آباد

نجف اشرف سے واپسی پر فخرالاتقیاء مولاناسیدوصی محمدصاحب مرحوم نے مدرسہ میں آکرشرح لمعہ وغیرہ کادرس دینے کی فرمائش کی۔ وثیقہ کے قیام ہی کے دوران آپ نے انگریزی سیکھی اورمختلف امتحانات دیتے ہوئے ایل ایل بی کی ڈگری بھی حاصل کی ۔

علمی آثار
الف :ترجمے :

قانون اساسی جمہوری اسلامی ایران

بعض عربی اورفارسی کے طویل مقالوں کاترجمہ بھی شامل ہے

ب:تصانیف وتألیفات :

۱۔الامام:علی میاں ندوی نے سیرت امیرالمومنین ؑ پرایک کتاب ’’المرتضیٰ ‘‘لکھی جس میں حقائق کو توڑ مروڑ کر پیش کیا گیا تھا ،مولانا موصوف نے اس فتنہ پرور کتاب کا عالمانہ جواب ’’الامام‘‘ کے نام سے ۱۹۹۴ء میں شائع کیا(افسوس علالت کی وجہ سے اس کادوسراحصہ شائع نہ ہوسکا شاید کچھ مسودے محفوظ ہوں )

۲۔انقلاب ایران :اس کتاب میں انقلاب اسلامی ایران کے سلسلہ میں عدم معرفت اور نادانی کی بنا پر زبان اعتراض کھولنے والوں کے لئے دعوت دی گئی ہے۔ ۱۳۹۹ ھ میں ادارہ نور اسلام ،فیض آباد سے شائع ہوئی ۔

۳۔انوار:اقوال چھاردہ معصومین پرمشتمل ’’انوار‘‘نامی کتاب مرتب کی جومقبولیت کے پیش نظرمختلف اداروں سے شائع ہوتی رہی ہے اس کاہندی ترجمہ بھی شائع ہوچکا ہے۔

۴۔افتخارالعلماء :یہ کتاب افتخارالعلماء مولانا سعادت حسین خان صاحب مرحوم کی حیات وخدمات پرمشتمل ہے ۔

۵۔جدیدفارسی ادب پرانقلاب اسلامی ایران کے اثرات (غیرمطبوعہ)یہ کتاب اصل میں مولانا مرحوم کی پی ،ایچ،ڈی (Phd)کی Thesisتھی۔

۶۔ جناب زینب سلام اللہ علیہا (غیرمطبوعہ نامکمل)

ج:مضامین

آپ نے بہت سے مضامین تحریر کئے جوہندوپاک کے مختلف رسالوں میں شائع ہوئے جن میںالواعظ،توحید،اصلاح، سرفراز، صداقت اورتنظیم المکاتب سرفہرست ہیں۔

مضامین کی تنظیم وترتیب کاکام چل رہاہے عنقریب ویب سائٹ کے ذریعہ مومنین کی خدمت میں پیش کئے جائیں گے ۔

آپ کے خدمات
دینی خدمات :

۱۔مختلف شہروں اوردیہاتوں میں مساجداورامامباڑوں کی بنیادرکھی اوران کی تعمیرمیں مالی تعاون کیانیزتعمیرمساجدکمیٹی کی بنیادبھی رکھی ۔

۲۔بہارپورکے آبائی امام باڑے کی تعمیرنو کروائی اور اپنی وصیت کے مطابق اسی میں سپردلحدہوئے ۔

۳۔آپ نے متعدداداروں کے ساتھ بھرپور تعاون کیاجن میں مجلس علماء وواعظین اورتعمیرمساجدکمیٹی شامل ہیں۔

۴۔مدرسۃ الواعظین کے وائس پرنسپل ہونے کے بعدآپ نے مدرسہ میں بہت سے ترقیاتی کام کئے ۔کتب خانے کے لئے جدید کتابیں حاصل کیں ۔بوسیدہ عمارت کی تعمیرنوکی مہم چلائی اورمتعددکمرے تعمیرکروائے ،ماہنامہ الواعظ کوعلمی اورمالی تعاون کے ذریعہ کافی ترقی دی نیز مدرسہ میں دینی معلومات کاہفتہ وارپروگرام ہوتاتھا جس میں اہل شہربھی شامل ہوتے تھے۔

۵۔وقت کی اہم ترین ضرورت کے پیش نظرآپ نے مجلس علماء وواعظین سے بہت سی کتابیں شائع کروائیں جن میں علی ؑفی القرآن، اہل البیت ؑفی القرآن ،شہرشہادت ،امام مہدی (عج )حدیث کی روشنی میں،ایسا ہی ہے حکم اسلام کاوغیرہ شامل ہیں۔

ادبی خدمات:

شعروشاعری کے علاوہ ادبی مضامین اورانشائیے شامل ہیں جومختلف ناموں سرفراز میں شائع ہوئے ۔

اجتماعی خدمات
۱۔لکھنؤکی تحریک عزاداری میں نمایاں حصہ لیا۔

۲۔عراق کے قیام کے دوران آیۃ اللہ یوسف حکیم کی حفاظت کے لئے بڑھ چڑھ کرحصہ لیا۔

آپ اس سلسلے میں اتنے سرگرم تھے کہ حکومت کی بلیک لیسٹ میں نام آگیاتھالیکن اس کے باوجود اپنی ذمہ داری سے دست بردارنہیں ہوئے آخرکارآیۃ اللہ حکیم کے خانوادہ کی طرف سے آپ کوشام بھیجنے کاانتظام کیاگیااورآپ بحفاظت حدودعراق سے نکل آئے ۔

۳۔آیۃ اللہ خمینی ؒ نجف اشرف میں رہ کرایران کی شاہی حکومت کے خلاف تحریک چلارہے تھے آپ نے اس تحریک میں بھی غیرمعمولی حصہ لیا جس کے نتیجے میں حکومت کے معتوبین میں شمارہونے لگے اورنام بدل کرہندوستان واپس آناپڑا۔

شخصیت کی خوبیاں
۱۔حق کے لئے جانثاری کاجذبہ :عراق وایران کی تحریکیں اس بات کی گواہ ہیں۔

۲۔جلدی معاف کردینا۔ ۳۔اپنے دشمنوں سے نیک برتائوکرنا۔

۴۔مادی چیزوں سے بے رغبتی ۔ ۵۔غیبت کرنے والوں سے دوری ۔

۶۔اہل بیت طاہرین ؑکے دشمنوں سے شدید نفرت اوراظہاربیزاری ۔

اولاد
۱۔حجۃ الاسلام مولانامصطفیٰ علی خان (شمیل)آپ حوزہ علمیہ قم میں زیرتعلیم ہیں اوراپنے والدگرامی کے کارناموں کومنظرعام پرلانے اوران کے ادھورے کاموں کومکمل کرنے کی جدوجہدکر رہے ہیں، خداان کی توفیقات میں اضافہ فرمائے ۔

۲۔مرتضیٰ علی خان (کمیل)

۳۔احمدعلی خان (زہیر)

۴۔مہدی علی خان (سہیل)

ایک یادگارلمحہ
عراق میں قیام کے دوران ایک مرتبہ درسی مذاکرہ میں جاسوسوں نے عراق پولس کومولانامرحوم کی موجودگی کی اطلاع پہنچادی ،پولس صرف انہیں کوتلاش کرنے وہاں پہنچی تھی لیکن ان میں ذرابھی اضطراب پیدانہ ہوا زیر لب یہ آیت پڑھتے رہے ’’وجعلنامن بین ایدیھم سداومن خلفھم سداًفاغشیناھم فھم لایبصرون ۔‘‘ (یس ؍۹)

ہم نے ایک دیواران کے آگے کھڑی کردی اورایک دیواران کے پیچھے ،ہم انھیں ڈھانک دیااب انھیں کچھ نہیں سوجھتا۔

پولس وہاں کچھ دیرتک کھڑی رہی اورپھرواپس چلی گئی توان کے رفقاء کی جان میں جان آئی سب نے ا س لرزہ خیزواقعہ پردیرتک تبصرے کئے لیکن یہ تمام تبصروں کاجواب ہلکی سی مسکراہٹ سے دیتے رہے ۔

وفات

آپ کے گردے خراب ہوچکے تھے بڑے فرزندبرادرعزیزمولانامصطفیٰ علی خان(شمیل)صاحب نے اپنے گردے کی پیشکش کی جسے انھوں نے ایک عرصہ تک ٹالاآخرڈاکٹروں کے اصرارسے مجبورہوکرگردے کی تبدیلی کاآپریشن ہوا ڈاکٹروں نے چھ مہینے تک سخت حفاظت اوراحتیاط کامشورہ دیاتھاکہ انفکشن نہ ہوجائے لیکن دوہی مہینے میں لکھنؤ آگئے اورعیادت کرنے والوں میں ایساگھرے کی سخت انفکشن ہوگیادوبارہ دہلی گئے لیکن وقت موعود آچکاتھا۴؍محرم۱۴۲۱ھ کودارفانی سے داربقا کی طرف کوچ کرگئے۔میت لکھنوہوتے ہوئے وطن (بہارپور)پہنچی نمازمیت مرحوم کے فرزند اکبر مولانا مصطفی علی خان شمیل نے پڑھائی ۔

مدفن:حسینیہ بہارپور،ضلع سلطان پور ۔

مجتبیٰ علی خان عابد

سوانح حیات
مولانا شیخ روشن علی صاحب منہیارپور ضلع سلطان پور کے باشندے تھے ۔ آپ ۲۰ رمضان المبارک 1354 ھ کو پیدا ہوئے ۔

ابتدائی تعلیم کے بعد مدرسہ ناظمیہ میں داخل ہوئے جہاں سے 1377ھ میں ممتازالافاضل کی سند حاصل کی ۔

سنہ 1378 ھ میں نجف اشرف تشریف لے گئے اور وہاں سے واپس آکر مدرسہ ناظمیہ میں مدرس ہوگئے ۔

یہ بات قابل ذکر ہے کہ آپ دوران طالب علمی میں بھی مدرسہ ناظمیہ میں تدریس فرما رہے تھے ۔

ناظمیہ کے بعد آپ منصبیہ عربی اسکول میرٹھ میں پرنسپل رہے ۔

تلامذہ
آپ کے شاگردوں کی ایک کثیر تعداد ہند و پاک میں پھیلی ہوئی ہے ۔ چند نام جو بہت نمایاں ہیں یہاں درج کئے جاتے ہیں:

جناب ادیب الہندی رہ

جناب سید منظور محسن صاحب

جناب سید ناظم علی خیر آبادی صاحب

و غیرہم

تراجم
آپ نے تقریبا اٹھارہ کتابیں عربی و فارسی سے اردو میں ترجمہ کرکے شائع کیں جن میں مجتبیٰ موسوی لاری ، محمد تیجانی سماوی ، علامہ محمد مہدی آصفی اور سازمان تبلیغات اسلامی کی کتابیں شامل ہیں ۔

وفات
آپ آیۃ اللہ سید محمد روحانی طاب ثراہ کے نمائندہ خاص تھے ۔ آپ وفات سے کئی سال پہلے سے ایران میں مقیم تھے آخری بار جب لکھنو تشریف لائے تو چند مہینوں کے اندر 25 ذی الحجۃ 1415 ھ کی صبح کو بستر پر مشتبہ حالات میں مردہ پائے گئے ۔

چونکہ لاش کا پوسٹ مارٹم نہیں ہوا تھا اس لئے سبب موت کے بارے میں جو کچھ سنا گیا ہے اسے لکھنا مناسب نہیں ہے ۔

روشن علی خان

سوانح حیات
مولانا سید رضا موسوی رہ ابن اکبر شاہ مرحوم کا تعلق کرگیل سے ہے ۔ آپ کی ولادت 5 رجب المرجب 1339 ہجری علما کے گھرانے میں ہوئی۔

ابتدائی تعلیم کرگل میں مولانا شیخ علی برلمو صاحب سے حاصل کیا پھر بغرض تحصیل علوم پنجاب اور بمبئی ہوتے ہوئے نجف اشرف روانہ ہوئے اور جس وقت آپ نجف اشرف پہنچے تو آپ کے لئے بعض دروس سخت لگنے لگے تو آپ نے حضرت امیرالمومنین علیہ السلام کی بارگا میں توسل کیا اور بطور معجزہ آپ کا ذہن اور حافظہ تیز ہوگیا یہاں تک کے جو علوم بلند مدت میں دیگر طلاب حاصل کرتے تھے ، آپ نے مختصر مدت میں حاصل کر لیا۔ آپ کی محنت اور علمی صلاحیت کی وجہ سے آپ نجف اشرف میں علما کے نزدیک کافی مشہور ہوچکے تھے اور آیت اللہ العظمی محسن الحکیم رہ نے آپ کو فاضل ہند کے لقب سے نوازا۔

مختلف مراجع اور علما نے آپ کو اجازت مرحمت فرمائی جن میں آیت اللہ سید محسن الحکیم رہ ، آیت اللہ العظمی سید روح اللہ خمینی رہ قابل ذکر ہیں۔

مولانا سید رضا موسوی نجف اشرف میں علوم آل محمد علیہم السلام حاصل کرنے کے بعد اپنے وطن واپس آئے ۔ علمائے کرگل کے ہمراہ حوزہ علمیہ اثنا عشری کرگل قائم کیا جس میں طلاب علوم دینی حاصل کرتے تھے اور مومنین کے دینی امور بھی اسی جگہ حل و فصل ہوتے تھے۔ آپ کی صلاحیتوں کو دیکھتے ہوئے تمام علما نے فیصلہ کیا کہ آپ کو کرگل کا قاضی القضاۃ منصوب کیا جائے ۔

مولانا سید رضا موسوی کرگل پہنچنے کے بعد مختلف قومی خدمات میں مشغول رہے اور اپنے گھر میں جہاں ایک باغ بھی موجود تھا، ایک حوزہ علمیہ بھی شروع کیا اور طلاب کی تربیت دینے میں کوشاں تھے۔

آپ کے اخلاق کا تذکرہ ابھی تک مومنین کی زبان اور دلوں میں باقی ہے ۔ آپ جہاں بھی جاتے تھے سب سے پہلے وہاں کے مومنین کی فقہی ضرورتوں کی طرف متوجہ ہوتے تھے اور اسی طرح تمام مومنین چھوٹے اور بزرگ حضرات سے خاص احوالپرسی کرتے تھے۔ اکثر ایسا ہوتا تھا کے مولانا سید رضا موسوی صاحب مومنین کے امور میں اتنا مصروف ہوجاتے تھے کہ کئی کئی مہینوں تک اپنے گھر کی طرف واپس نہیں آپاتے تھے۔

سنہ 1405 ہجری میں آپ کی وفات ہوئی اور بڑے احترام کے ساتھ مومنین نے آپ کوسپرد لحد کیا ۔ آج بھی آپ کی قبر مومنین کے لئے زیارتگاہ کی حیثیت رکھتی ہے اور حاجتیں پوری ہوتی ہیں ۔

تدریس
آپ نے نجف اشرف میں قیام کے دوران حرم مولا امیرالمومنین علیہ السلام کے سامنے مسجد ہندی میں تدریس کا سلسلہ جاری کیا جس میں طلباء حاضر ہوتے تھے اور آپ سے حوزوی دروس پڑھتے تھے۔

آپ کا شمار نجف کے بہترین اساتید میں ہوتا تھا اور آپ مختلف سطح کے کتابوں کی تدریس فرماتے تھے۔

سید رضا موسوی

سوانح حیات
مولانا سید محسن رضوی صدر مفسرین آیۃ العظمی سید راحت حسین گوپال پوری طاب راہ کے تیسرے بیٹے تھے۔ آپ کی ولادت وطن مالوف گوپال پور (ضلع سیوان) میں ۲۹/ جمادی الثانيه ۱۳۳۵ھ کو ہوئی تھی۔ آپ نے ابتدائی تعلیم اپنے پدر بزرگوار سے حاصل کی ۔ کسی حد تک اپنے برادر بزرگ مولانا سید علی صاحب طاب ثراہ سے بھی گھر پر ہی کسب فیض کیا۔ پھر سلطان المدارس میں داخلہ لیا اور امتیازی نمبروں سے صدر الافاضل کیا۔ اس کے بعد مدرسة الواعظین میں داخل ہوئے اور وہاں سہ سالہ کورس پورا کر کے دوسال مدرسہ کی طرف سے تبلیغی خدمات انجام دیئے۔

چونکہ آپ کے والد ماجد ذیابیطس کے مریض تھے نیز ان کو اپنے تحریری مشاغل میں کسی معاون کی بھی ضرورت تھی جو حوالے وغیرہ نکال سکے۔ اس لئے آپ نے تقریبا دس سال آن بزرگوار کی خدمت میں گوپال پور اور لکھنو میں گذارے۔ 1376 ھ میں ان کے انتقال کے بعد آپ موگادیشو (صومالیہ ) بحیثیت امام جمعه و جماعت تشریف لے گئے۔ وہاں سے علیحدہ ہونےکے بعد آپ یوگانڈاگئے۔ ۱۹۷۳ء میں کمپالا میں آپ امام جمعه جماعت تھے ، کچھ عرصہ کے بعد وہ تانزانیا آئے اور عروشادار السلام اور مٹاناوغیرہ جماعتوں میں لوگوں کو فیض پہنچاتے رہے۔ ماڈاگاسکر بھی تبلیغ کے لئے تشریف لے گئے۔

حدود ۱۹۸۰ء میں وہ افریقہ سے واپس آئے ۔ عرصہ دراز سے انھوں نے اپنی سسرال بڑا گاوں گھوسی کو اپنا وطن بنالیا تھا۔ اور وہیں مقیم رہے۔ حدود ۱۹۸۸ء میں آپ کو مدرسة الواعظین کا پرنسپل بنایا گیا جہاں تقریبا آٹھ سال رہے۔ پھر وہاں سے علیحدہ ہو کر بڑا گاوں گھوسی واپس آ گئے ۔ 1999ء میں آپ کی اہلیہ نے انتقال کیا تو آپ بہت زیادہ متاثر ہوئے۔ آپ خودعلیل رہنے لگے تھے۔ ۲۸ فروری ۲۰۰۰ء کو دل کا دورہ پڑا۔ علاج کے لئے بنارس لے جا کر بنارس ہندو یو نیورسٹی کے اسپتال میں داخل کیا گیا۔ مگر جاں بر نہ ہو سکے۔ 25 ذی الحجہ 1420 ہجری کو رات کے ساڑھے دس بجے رحلت فرمائی۔ لاش بڑا گاوں لائی جہاں 27 ذی الحجہ کو تدفین ہوئی۔

سید محسن رضوی گوپال پوری

سوانح حیات
مولانا سید سکندر حسین ابن مولانا سید محمد حسین صاحب محقق ہندی رکاب گنج لکھنو میں 19 رجب 1334 ہجری میں پیدا ہوئے ۔ آپ کے والد اپنے دور کے عظیم مجتہد اور خطیب تھے، جو محقق ہندی کے لقب سے مشہور ہوئے ۔ یہ موصوف ہی کی ذات تھی کہ لکھنو میں درس خارج کی ابتدا کی تھی۔

مولانا سکندر حسین صاحب قبلہ نے ایسے عالم متبحر باپ سے 13 سال کی عمر تک کسب فیض فرمایا اور پھر والد کے انتقال کے بعد اپنے برادر بزرگ مولانا سید ظفر حسین صاحب قبلہ مجتہد و مولانا سید صادق حسین صاحب قبلہ مجتہد سے تکمیل فرمائی ۔

جوہر خطابت ورثے میں ملا تھا۔ عنفوان شباب ہی سے مومنین گرویدہ ہونے لگے ۔ اور بیان کا شہرہ دور دور تک پھیلنے لگا۔ ابھی 17 سال کی عمر تھی کہ سرکار ناصر الملۃ طاب ثراہ و سرکار نجم الملۃ طاب ثراہ نے اجازت مرحمت فرمائی۔

نوجوانی ہی میں تقریبا تمام ہندوستان کا دورہ بحیثیت ذاکر کرلیا اور شہرت افریقہ تک پہونچی جہاں کے مومنین کے پیہم اصرار پر آپ 1948 میں ایسٹ افریقہ تشریف لے گئے ۔ جہاں آمد و رفت کا سلسلہ 1950 تک برابر جاری رہا ۔

بڑے صاحب ذوق ، خوش پوشاک ، نازک مزاج تھے، لکھنو یونیورسیٹی کے فاضل ادب کا امتحان پاس کیا ۔ 1946 کی بات ہے کتب خانہ ناصر الملت میں مولانا محمد سعید صاحب ، مولانا محسن نواب صاحب ، مولانا سعادت حسین صاحب ، ملا طاہر صاحب مرحوم جمع ہوا کرتے تھے ۔ مولانا سکندر صاحب بھی اسی حلقے کے ممبر تھے ۔ تقریر کرتے اور مجلسیں پڑھتے تھے۔ 1950 کے لگ بھگ افریقہ چلے گئے تھے ۔ وہاں خوجہ اثنا عشری جماعت کی سرگرمیوں کے رکن قرار پائے۔ بمبئی میں موصوف کی بڑی قدر و عزت تھی۔

آخر عمر میں صحت کی خرابی کی وجہ سے طویل سفر ترک کردیئے تھے۔ مگر محبت امام حسین علیہ السلام کا جذبہ اس قدر غالب رہتا تھا کہ سفر کربلا برابر فرماتے رہتے تھے اور ابھی بھی پا در رکاب تھے کہ پیغام اجل پہونچ گیا۔

مولانا ایک بلند پایہ عالم اور کامیاب خطیب ہی نہ تھے بلکہ ایک حاذق طبیب بھی تھے جس سے سوائے چند احباب کے کوئی واقف نہ تھا۔

اقربا کا خیال ، احباب کی خدمت اور قدیم وضعداری ان کی ذات میں مجسم ہوگئے تھے۔

مرحوم نے اپنی یادگار میں چار صاحبزادے اور تین صاحبزادیاں چھوڑی ہیں ۔

افسوس کہ یہ روشن چراغ 2 صفر ۱۳۹۳ ہجری میں حرکت قلب بند ہوجانے کی وجہ سے ہمیشہ کے لئے خاموش ہوگیا اور قوم کو اپنے غم میں اشکبار چھوڑ گیا۔

سید سکندر حسین زیدی

سوانح حیات
تاج العلما مولانا سید محمد زکی صاحب محرم 1329 جنوری 1909 کو لکھنو میں متولد ہوئے ۔ آپ سرکار نجم العلما کے پوتے تھے ۔ آپ کے والد ماجد سید محمد صاحب سرکار نجم العلما کے بڑے فرزند تھے ۔ سید محمد زکی ابھی 9 سال کے تھے کہ سایہ پدری سے محروم ہوگئے اور آپ کی تعلیم اور پرورش کی پوری ذمہ داری نجم العلما نے اٹھا لی ۔ ابتدائی تعلیم کے بعد مدرسہ ناظمیہ کے تمام مدارج طے کئے اس کے بعد نجف اشرف تشریف لے گئے ْ پانچ سال کے بعد جب وطن واپس آئے تو وہ دن سرکار نجم العلما کے لئے انتہائی شادمانی اور مسرت کا دن تھا ۔

اب مدرسہ الواعظین کا شعبہ نشر و اشاعت آپ کی نگرانی میں دیا گیا ۔ 1965 میں آپ مدرسہ کے متولی بنائے گئے ۔ الواعظ میں ایک صفحہ آپ کے لئے مخصوص تھا جس میں آپ فقہی مسائل کے جوابات لکھتے تھے ۔ بقول مولانا سید آغا مہدی صاحب مرحوم کے ’’اس زریں دور میں مدتوں سے ملتوی شدہ اجلاس (دوبارہ ) جاری ہوئے ‘‘ یہ اجلاس کئی کئی دن تک کبھی کلکتہ ، کبھی پٹنہ ، کبھی لکھنو میں ہوتے ۔ جن میں عظیم الشان اجلاس ( چہاردہ صد سالہ یادگار مرتضوی ) بھی شامل تھا ۔

جب سرکار مفتی سید احمد علی صاحب نے عتبات عالیات کا سفر کیا تو تقریبا چھ مہینہ تک مدرسہ ناظمیہ کے پرنسپل کی ذمہ داریاں بھی آپ کے سپرد رہیں ۔

تصنیفات:
الواعظ اور مسلم ریویو کی ہر اشاعت میں سالہائے سال مضامین لکھتے رہے ۔ کئی رسالے لکھے جن میں الانجیل کو تبلیغی اعتبار سے بڑی مقبولیت حاصل ہوئی ۔

تاج العلما نے 23 ربیع الاول 1418 کو تقریبا ساڑھے آٹھ بجے شب میں رحلت فرمائی اور اپنے دادا نجم العلما کے پہلو میں دفن ہوئے ۔

شخصیات