امام خمینیؒ صہیونزم کے مقابلے میں

امام خمینیؒ صہیونزم کے مقابلے میں

مکتب حسینی کے پروردہ ظلم کے سامنے کبھی نہیں جھکتے کیونکہ اس مکتب نے ظلم سے ٹکراکر اسے نیست و نابود کرنا سکھایا ہے، امام حسین علیہ السلام نے یزید و یزیدیت کو اس طرح فناء کے گھاٹ اتار دیا کہ اب اس کا کوئی نام لیوا ہی نہیں بلکہ؎ نام یزید داخل دشنام ہوگیا، جس کے عزم محکم کی ہلکی سی چوٹ اگر قلبِ کافر پر پڑی تو وہ مسلمان ہوگیا، مسلمان پر پڑی تو باایمان ہوگیا، مؤمن پر پڑی تو حسینی ہوگیا، حسینی پر پڑی تو خمینیؒ ہوگیا۔

 بیت المقدس کی غاصب حکومت کے بارے میں امام خمینیؒ کے نظریات اور تقریروں پر مشتمل یہ کتاب ایسی بے نظیر کتاب ہے جس کے مطالعے سے امام خمینی کی بالغ نظری، سیاسی بصیرت، ایمانی قوت، مردانہ لہجہ کی انا، اصابت فکر، صلابت رائے اور عزم محکم کا اندازہ لگایا جا سکتا ہے۔ آپ نے دنیا کے مسلمانوں کو متعدد مرتبہ اس بات کی طرف متوجہ کیا کہ مسئلہ فلسطین کے سلسلے میں سلاطین و شیوخ و استعماری ایجنٹ کی طرف دیکھنا وقت کی بربادی ہے، یہ سب اپنی چار روزہ حکومت کے لیے جی رہے ہیں ان کے ضمیر مردہ ہیں یہ چلتی پھرتی لاشیں ہیں اور مسلمانوں کی پیشانی پر کلنگ کا ٹیکہ ہیں، ذلت و رسوائی کے نشان ہیں مسلمانوں سے کوئی ہمدردی نہیں ان کو اپنا تخت و تاج پیارا ہے۔

اس کتاب میں اس تقریر کا خلاصہ پڑھیں گے جب اسلامی دنیا کے سفیروں کے سامنے اس مخلص رہنما نے صدام سے اسرائیل پر حملہ کرنے کا راستہ مانگا تھا اور اس نے جن شرائط پر راستہ دینے کا وعدہ کیا تھا، امام خمینی جیسا لیڈر کیا کوئی سچا معمولی انسان بھی ان شرائط کو قبول نہیں کر سکتا تھا۔ بہر حال آج دنیا دیکھ رہی ہے کہ امام خمینی کی پیشگوئی حرف بحرف صحیح صادق ہوئی، کاش دنیا کے مسلمان اب بھی حقیقت کو سمجھ لیں۔