جدید اردو مرثیہ

جدید اردو مرثیہ

بیسویں صدی میں مرثیے کا نیا سفر برصغیر کے اس زوال پذیر معاشرے کی دہلیز سے شروع ہوتا ہے جس میں فیوڈل سسٹم کے نئے جال بنے جا رہے تھے اور انگریزوں کی حاکمیت اس خطے میں اپنے نظام فکر کے بیج بو رہی تھی۔اسی دوران شعر و ادب کا تعلق فرد سے زیادہ معاشرے سے جوڑا جانے لگا اور اجتماعی لب و لہجہ کو اہمیت ملی۔ نتیجتاً قومی اور ملی شاعری کو عروج حاصل ہوا اور مذہبی مرثیوں کی جگہ قومی اور شخصی مرثیوں نے لے لی، اقبال، نظم طباطبائی، صفی لکھنوی، ریاض خیرآبادی، اثر لکھنوی اور چکبست لکھنوی وغیرہ نے قومی اور ملی مرثیوں کے ذریعے ملت کو بیدار کرنے کی کامیاب کوشش کی۔زیر نظر کتاب "جدید اردو مرثیہ" محمد رضا کاظمی کی تصنیف ہے۔اس کتاب میں جدید مرثیہ کے ارتقاء پر تفصیلی بات کی گئی ہے اس کے علاوہ ترقی پسند مرثیہ اور نو کلاسکی مرثیہ وغیرہ جیسے موضوعات کے ذیل میں کئی جدید مرثیہ نگاروں کے فن پر گفتگو کی گئی ہے۔